Ný grein hefur nú bæst í safnið á síðunni, fersk úr prentsmiðjuni. Greinin birtist í tímaritinu ICES Journal of Marine Science og ber heitið „Movements of female lumpfish (Cyclopterus lumpus) around Iceland“. Höfundar hennar eru meðal annarra Dr. James Kennedy, starfsmaður Hafrannsóknarstofnunar með aðsetur hjá BioPol, og Halldór G. Ólafsson, framkvæmdastjóri BioPol. Þess má geta að þessi grein er sú fyrsta, af vonandi mörgum, sem birtist eftir James Kennedy síðan hann fluttist hingað til Skagastrandar.
Greinin fjallar um hegðunarmynstur grásleppu og ferðalög hennar milli fæðustöðva og hrygningastöðva við Ísland.
Hægt er að nálgast greinina rafrænt með því að smella hér eða með því að smella á tengilinn merktan „Skýrslur og Greinar“ hér til vinstri á síðunni og finna greinina í listanum.
Útdrátt úr greininni má lesa hér að neðan:
Ferðalög grásleppu kringum Ísland
Á vorin og sumrin finnst grásleppa við strendur Íslands þar sem hún hrygnir. Hins vegar er ekki mikið vitað um ferðir hennar eftir komu hennar á strandsvæðin í kringum landið. Heldur hún sig á einum stað eða ferðast hún milli svæða? Til að komast að því hrundi BioPol, í samvinnu við Hafrannsóknarstofnun Íslands, af stað verkefni sem snéri að merkingum á grásleppu. Grásleppa var veidd allt í kringum Ísland og var litlu örmerki með númeri og tengilsupplýsingum komið fyrir á hverjum fiski. Einnig var hver fiskur lengdar- og þyngdarmældur áður en honum var sleppt. Grásleppuveiðimenn voru hvattir til að hafa samband við BioPol og gefa upp númerin á merkjunum, veiðidag og veiðistað, ef þeir veiddu merktar grásleppur. Á árunum 2008-2014 voru 9710 grásleppur veiddar og merktar og 880 af þeim voru svo veiddar aftur.
Flestar grásleppurnar veiddust aftur nálægt fyrri veiðistað en einnig voru margar sem höfðu synt langar vegalengdir kringum Ísland. Einn fiskur sem sleppt var í Faxaflóa synti 587 km og var veiddur aftur rétt vestan við Melrakkasléttu. Sá fiskur sem synti hraðast synti 297 km á sex dögum, en það gerir 49 km dag-1 eða 2 km klst-1. Sumir fiskar veiddust einu ári eftir að hafa verið merktir og veiddust þeir þá flestir á svipuðum slóðum og í fyrra skiptið. Þetta bendir til þess að grásleppur komi aftur til sömu hrygningarstöðva ár eftir ár.
Einnig voru merktar grásleppur sem voru á leið sinni til Íslands frá vetrarstöðvum sínum. Þær voru veiddar í mars um borð í Bjarna Sæmundsson, rannsóknarskip Hafrannsóknarstofnunar, og eftir að hafa verið sleppt héldur þær leiða sinna á mismunandi svæði kringum Ísland. Niðursöður þessarar rannsóknar sýna að grásleppur geta vel synt langar vegalengdir, og eftir komuna til strandsvæða Íslands halda sumar sig á sama stað á meðan aðrar færa sig milli staða kringum landið.
BioPol og Hafrannsóknarstofnun vilja þakka öllum þeim grásleppuveiðimönnum sem höfðu samband vegna merktra fiska, án þeirra hefðu aldrei neinar niðurstöður orðið til.
Greinin var birt (á ensku) í tímaritinu ICES Journal of Marine Science. Ef þú vilt fá frítt eintak geturðu sent póst á netfangið biopol@biopol.is.
