Árið 2011 veitti Verkefnasjóður Sjávarútvegsins á samkeppnissviði  BioPol ehf, Tilraunastöð Háskóla Íslands í Meinafræði að Keldum og Fisk Seafood fjármuni til þess að rannsaka bandormssýkingu í ufsa við strendur landsins.

Ánægjulegt er að segja frá því að upphaf verkefnisins má rekja til þess að sjómenn á frystitogaranum Arnari HU 1 frá Skagaströnd urðu varir við breytingu í ástandi á ufsa sem veiddur var á ákveðnum svæðum við Ísland. Starfsfólki BioPol bárust sýnishorn af sýktum fiski og í framhaldi af því var haft samband við Árna Kristmundsson sérfæðing í sjúkdómum fiska af Tilraunastöðinni að Keldum. Í kjölfarið var ráðist í að skrifa umsókn til Verkefnasjóðs Sjávarútvegsins.

Í verkefninu verður leitast við að kortleggja útbreyðslu sýkingarinnar með söfnun á fiskum vítt og breytt um íslensku efnahagslögsöguna. Áhafnarmeðlimir um borð í Arnari HU 1 sjá um gagnasöfnun en frekari úrvinnsla mun fara fram hjá BioPol ehf og að Keldum.

Úrvinnsla á fyrstu fiskunum hófst í dag og á myndinni má sjá starfsfólk BioPol ásamt Árna Kristmundssyni vinna við krufningu á fyrstu fiskunum. Skemmst er frá því að segja að segja að nokkuð af þeim fiskum sem teknir voru til meðhöndlunar reyndust sýktir.

Engin vitneskja virðist liggja fyrir um þessa bandormstegund í ufsa, hvorki hérlendis né erlendis. Frumgreining hefur farið fram á tegundinni og virðist hún tilheyra bandormategundum af flokki Trypanorhyncha. Tegundir innan þessa flokks eru allþekktar erlendis, þó einkum fullorðinsstig þeirra. Lífsferill þessara tegunda krefst a.m.k. þriggja ólíkra hýsla. Fyrsta lirfustig ormanna finnst í ýmsum hryggleysingjum, þá einkum dýrasvifi. Annað lirfustig finnst í ýmsum tegundum fiska, bæði botnlægra tegunda sem og miðsjávarfiska. Fullorðinsstigið finnst svo í meltingarvegi brjóskfiska, þ.e. hákarla og/eða skata. Tegundir af þessum flokki eru almennt ekki taldar skaðlegar hýsli sínum en geta hins vegar rýrt verðmæti afurða sökum þess að þær festa sig í hold fiskanna og sitja því eftir í flökum sem koma úr flökunarvélum.